المشاركة الأصلية كتبت بواسطة ابو دانا الحربي
السلام عليكم كلن باسمه ..
عدة اسأله تجدها في قسم الاستفسارات غالبيتها عن الواي بروتين ... امثله على ذلك :
- احتاج الى بروتين سريع الامتصاص .. راح ادخل تنشيف وابي بروتين تنشيف (مثل الايزو) .
- اخذت 3 علب واي بروتين ومااستفدت منه .
- راح ادخل تضخيم وابي بروتين تضخيم .
- ماهو افضل بروتين مسائي .. يعني آخذه قبل النوم .
- استخدمت بروتين هايدروبيلدر أو نايتروتيك وفادوني كثيييير .
- متى ابدأ باستخدام الواي .
راح احاول انا اجاوب واتكلم شويه عن هالاسئله اللي بالاعلى .. ولكن قبل ذلك وعلشان اختصر عليك الموضوع .. 4 نقاط يجب أن تفهمها حتى تتعامل بشكل صحيح مع الواي بروتين :
1- تعامل مع الواي بروتين على أنه مصدر غذائي (food source) وليس مكمل (supplement) . يعني هو خيار من خيارات الاكل مثله مثل اللحم والحليب .. اقرب تشبيه للبروتين هو حليب بودره مجفف منزوع الدسم
2- دائما تذكر بإنه لايوجد اختلاف بين البروتين .. فالبروتين الموجود في الدجاج و والتونه والجبن هو نفسه الموجود في الواي بروتين ولكن تختلف النسب والتركيز .. والبروتين الموجود في الواي لايوجد فيه ماده سحريه تختلف عن بقية مصادر البروتين .
3- الهدف الاساسي من الواي البروتين .. هو انه اسهل طريقة للحصول على البروتين في اليوم للاشخاص الكسولين مثلي او للاشخاص اللي ماعندهم وقت لطبخ وجباتهم .
4- درجة سرعة الامتصاص (بطيء مثل الكازيين ومتوسط مثل الستاندر 100% والكومبات وسريع مثل الايزو والهايدرو واي ) هي دعاية من الشركات لاتهتم ولاتشغل نفسك بها .
حالياً اشتري الواي بروتين واستخدمه عندما لايكون عندي وقت لآكل وجباتي يعني في الاسبوع ممكن 3-4 سكوبات .
عندما اشتري الواي لايهمني سرعة الامتصاص او الشركه .. اشتري الواي اللي عليه عرض او تخفيض ويكون طعمه مقبول بالنسبه لي .
انا استغرب من شخص يتناول 150-200 غرام بروتين يوميا .. منها سكوب والاسكوبين واي بروتين يعني تقريبا 25-50 غرام والباقي يكون من الاكل الطبيعي .. ويعطي الواي اهميه كبيره ؟؟
نجي للاسئله :
- احتاج الى بروتين سريع الامتصاص .. راح ادخل تنشيف وابي بروتين تنشيف (مثل الايزو) .
هذا اكثر سؤال .. واكثر موضوع يُتحدث عنه .. اصبح البروتين واللي مهمته هو اعادة بناء الالياف العضليه التي تم هدمها في التمارين .. اصبح يتعامل معه لهدف التخسيس والتنشيف ؟؟ هل فعلا تحتاج ان نخاف من شوية الكارب والفات الموجوده في الواي البروتين العادي مقارنة بالبروتين الزيرو فات والزيرو كارب .. بالطبع لا .. المشكله انه ياخذ سكوب ايزو وياكل معه حبة موزه بعد التمرين .. طيب الموزه مافيها كارب وفات .. طيب الموز ماراح يختلط مع البروتين في معدتك ويبطأ من عملية الهضم (حتى لو اكلت مع الواي البروتين وجبه بعد ساعه او ساعتين نفس القصه راح تصير ) .. بروتين سريع الامتصاص او الهاديرو واي يستهدف الاشخاص اللي عندهم تحسس من اللاكتوز .
- اخذت 3 علب واي بروتين وماستفدت منه .
انت جالس تاخذ واي بروتين والا هرمون الجروث
طيب انت تاخذ سكوب والا سكوبين بروتين وحتى لو ثلاث في اليوم .. طيب ماذا عن بقية البروتين اللي يحتاجه جسمك .. ماذا عن الكارب والفات .. مثل ماذكرت في الاعلى الواي بروتين لايوجد فيه ماده سحرية تختلف عن البروتين الموجود في بقية الاطعمه ..
- راح ادخل تضخيم وابي بروتين تضخيم .
قصده بروتين القينر .. هذا طبعا اسميه بروتين الكسلاء جداً اشتر واي بروتين عادي واخلط معه شوفان .. منه كسبت كارب وزيادة وزن وأيضا راح يخليك تشبع والاهم وفرت فلوسك .. شخصياً مااشرب البروتين الا اخلط معه سكوب والا سكوبين شوفان ..
- ماهو افضل بروتين مسائي .. يعني آخذه قبل النوم .
لايوجد شيء اسمه بروتين مسائي او بروتين يغذي العضله طول فترة النوم .. الاهم انك تحرص على انك اخذت كمية البروتين اللي يحتاجها جسمك طوال اليوم وقبل ماتنام .
- استخدمت بروتين هايدروبيلدر أو نايتروتيك وفادوني كثيييير .
اكيد راح يفيدك .. لإن هذي النوعيه من البروتينات مخلوط معها كرياتين .. فالفائده والشيء اللي فرق معك هو الكرياتين وليس البروتين بحد ذاته .. طبعا لاانصح به .. اشتر واي بروتين عادي وكرياتين واخلط على كيفك بالكميه اللي تبيها ووفرعلى نفسك .
- متى ابدأ باستخدام الواي .
مثل ماذكرت في الاعلى .. تعامل مع البروتين على انه مصدر غذائي وليس على انه مكمل .. تقدر تسخدمه في اي وقت .. تقدر تستخدمه حتى لو ماتلعب رياضة كمال اجسام اذا ماكنت تقدر تاكل بروتين من الاكل الطبيعي لاي سبب من الاسباب .
حتى تبني عضلاتك فأنت تحتاج الى بروتين مهما كان مصدره .. توقف عن إشغال نفسك ومطاردة آخر صيحات الموضه في عالم الواي بروتين
واحرص وعود نفسك بتوفير كمية البروتين المطلوبه من الاكل الطبيعي ..
تحياتي للجميع ..