الموضوع اكبر من تنظيم القاعده
اهو صناعه التنظيم عشان يتعاطفون معهم المسلمين فقط وينشغلون فيه و في اعمالهم
من متى الدين الاسلامي صار دين ارهاب ؟
لو تسأل اي شخص حتى وان كان غير مسلم ولكن مثقف و مطلع و تقوله ماذا يدعو له الدين الاسلام ؟
راح يقولك يدعو الى السلام و المساواه بين الناس و عدم ظلم احد او قتله , لأن دين الاسلام دين تسامح
الحين تسأل اي شخص غير متعلم وتقوله ماذا يدعو له الدين الاسلامي ؟
راح يقولك يدعو الى القتل والارهاب
ليش تنظيم القاعده يحاول بكل قوه انه يرسل اشارات للعالم ان هدفه هو الحرب ؟
ليش مايصدر التنظيم افلام بين كل فتره وفتره تنور الناس عن حقيقه اعمالهم ؟ مثلا يعطون دروس عن الجهاد ولماذا يجاهدون هم ضد امريكا
ماتشوف الا بن لادن و الظواهري يطلون عليك بالتلفزيون وكل واحد يدعو لقتال الغرب او الخروج عن الحكام
طيب انا عايش عيشه كريمه في بلدي اخرج على الحاكم ليش ؟
عشان اروح افغانستان واعيش مختبئ طول عمري في الجبال , بالحاله هذي تكتب لي الجنه ؟
تنظيم دايخ
عايشين في الظلام ماتدري منو يمولهم ولا تدري شنو يعملون الان , وين الظواهري الحين ؟ تبيني امشي خلف وهم ؟ امشي خلف رجل ماادري وينه بالضبط ويقولي روح قاتل وانا ماادري اقاتل منو ؟
انت الحين ومستعد احلف انك لو قررت تسوي تنظيم جديد , وتقول بما ان الكل مشكك بتنظيم القاعده انه تابع للأداره الامريكيه , خلني اسوي تنظيم ادعو الشباب للأنضمام واجاهد الغرب عشان محد يقول عني صناعه امريكيه والكل يتعاطف معي
تدري يا استاذي الفاضل ان لو تقوم بعمل هذا الشي , انا مابي اقول يوم او يومين , لكن ثق تماما انك خلال شهر راح تكون داخل السجن والشباب اللي معاك انضموا راح يكونون معاك بنفس الزنزانه
تدري ليش ؟
لأن ماعندك غطاء امريكي يحميك و يرسلك ويمولك ويوصلك هنا وهناك , ماعندك احد يعطيك حصانه من الحكومات وتتنقل بطائره خاصه وتروح بيتكم فيها بعدين تروح افغانستان وترجع ثاني يوم عشان تتغدى مع اهلك
تنظيم القاعده او رؤوس التنظيم هم اللي عندهم الحصانه هذي من امريكا , وهم القادرين على التنقل و جمع الاموال , كل شخص يحاول انه ينظم مع التنظيم يصيدونه ثاني يوم , الا بن لادن اللي انتهت صلاحيته و قالوا خلاص اطلع تقاعد و نسوي مسرحيه اننا نقتلك ونلقيك في البحر
انت على بالك مزارع الحشيش والنفط اللي امريكا تنظر لها بعين الاعتبار
اصلا الاداره الامريكيه مايهمها الشعب الامريكي او غيره , الاداره الامريكيه هي مجرد مجموعه اشخاص يديرونهم مجموعه اشخاص يملكون العالم , منهم رجل يمتلك اكثر من 400 مصنع لصناعه الاسلحه
شلون ماتبي الاداره الامريكيه تقوم بصولات وجولات في العالم دام ان احد محركين الاداره الامريكيه تاجر سلاح ؟ تبي اسلحته تطيح بجبده
وغيره وغيره الكثير اللي لهم مصالح حول العالم , ولكن الاهم اهو النفط عشان تشتغل مصانعهم و المخدرات لتلف الشعوب وجعلهم مساطيل طول اليوم
القصه اكبر من اللي انت حاطه في بالك , لا تفكر ان امريكا ليش تصنع تنظيم يقاتلها ؟ اكيد ان التنظيم مو صناعه امريكيه طالما يقاتلها
الموضوع لا تشوفه جذي , التنظيم قدم خدمات جليله للأداره الامريكيه , خصوصا لما قال جورج بوش اللي مو معاي مع الارهاب , نسب التنظيم الى الارهاب , فجعل كل العالم معاه ضد الارهاب
بالطريقه هذي تدري شنو صار ؟ 800 قاعده امريكيه حول العالم
ماكو حكومه في دوله تتخذ قرار قبل ان تذهب الى السفاره الامريكيه و يطلعونها على قراراتها واذا في شي يحتاج تعديل
دخول الشركات الامريكيه العالم , هل تصدق ان منغوليا في ماكدونالدز
اليابان من تاريخهم كانوا مجتمع مغلق ممنوع احد يدخل اليابان , بعد الحرب العالميه افتحوا اليابان و لعبوا فيه واغلب الشركات اليابانيه صارت تتبع امريكا
كم خسروا من الحرب على اليابان وكم ربحوا بعدها
كم خسروا من التنظيم وكم ربحوا بعده
1000 جندي 5000 الاف جندي 10000 الاف جندي امريكي يموت ؟ مو مهم طالما الماسونيون يسيطرون على الوضع كله وهؤلاء مجرد جنود يخدمون مصالحهم فقط
اذا مات نعطيه وسام شجاعه لأسرته و 10 الاف دولار و انتهى الموضوع
لكن بالمقابل ملايين تدخل حساباتهم
يعني لاتفكر ان الموضوع واقف على نفط وحشيش و 200 جندي يموت
لو اقول لأي شخص ليش التنظيم قاعد بأفغانستان ؟ ليش مايروحون امريكا نفسها و يعيشون هناك , ويزرعون سيارات طالما عندهم القدره على صناعه المتفجرات , ويفخخون السيارات ويفجرونها هناك
يجندون اناس هناك من اللي متعاطفين معاهم , امريكا تقعد على رخصه سلاح تاخذها بنفس اليوم , يروح يشتري اسلحه ويقاتل اذا كان فعلا مجاهد ويبي الشهاده , يقاتل في عقر دارهم بما انهم مسخرين له كل شي وحتى مواد المتفجرات تباع في البقالات نفس اللي حصل في تفجيرات اوكلاهوما سنه 95 اعتقد
شاب امريكي نسف مبنى كامل بسياره مفخخه , التنظيم يبدأ نشاطه هناك ويقاتل امريكا فعليا , مو مختبئ في افغانستان ويقاتل ماتدري منو يقاتل , الافغان اللي يقتلون اكثر من الجنود الامريكان
مثل مايزعمون ان 12 شخص او مادري كم العدد بالضبط اللي اختطفوا الطائرات , وتدربوا على القياده , يروحون نفسهم ويستمرون بالتدفق على امريكا كسياحه او دراسه , لأن امريكا تعطي فيزا 10 سنين
يروحون وبال10 سنين يجاهدون ولا اصلا مهم الفيزا تنتهي او لأ لأنهم راح يقعدون يقاتلون الى ان يستشهدون او تطيح عليهم دائره الهجره وتسفرهم
يمكن واحد يقول امريكا يمكن تشك فيهم وماتدخلهم لأنهم عرب ومسلمين
يمكن تدرون ليش ؟ لأن ما بدأت هالاجراءات هذي الا بفضل التنظيم , وصار المسلم اللي يبي يسافر يتم تفتيشه بدقه اكثر من المسيحي او البوذي
ويمكن تتشابه الاسماء و يروح لقسم الشرطه في المطار نفس ما حصل مع صاحبي لما كنا في مطار احدى الدول الاسيويه , تعطيل 10 ساعات لأنه اسمه يشبه اسم احد المطلوبين
لو تنظيم القاعده كان فعلا تنظيم مجاهد حقيقي , كان نقل المعركه من بلاد المسلمين الى بلاد الغرب , من البدايه كان ارسل المجاهدين الى امريكا لترتيب الامور واستقبال كل مجاهد يطلب الجهاد
ولكن الموضوع انهم قاعدين مختبئين لا تعرف لهم طريق في بلاد المسلمين , طبعا الحكومات ماتعرف لهم طريق فتأتي امريكا وتغزو البلد بهدف القضاء على التنظيم و اهو التنظيم اساسا غير موجود
وبعدين بلد تحب الاداره الامريكيه بغزوه ترسل كم شخص يدعي انه من تنظيم القاعده و بعدين تهجم عليه
اول شي افغانستان , تم الغزو
العراق ؟ ارسل القاعده , تم ارسال القاعده , محاربه الارهاب , تم ارسال القوات
العراق الان ؟ تم الغزو
طيب ارسلوا كم واحد حق فرنسا عشان امريكا تغزو فرنسا ؟
ارسلوا لكندا عشان امريكا تغزوها , او استراليا , كبار بالمساحه وراح يتوهون الشرطه والجيش في البحث عنهم وراح يستعينون بأمريكا
ليش بالذات الدول الاسلاميه تنشط القاعده ويتم غزوها ؟
لاحظ يا استاذي ان الدول الصديقه لأمريكا ماتسمع ان في تنظيم قاعده , يمكن تحصل مجموعه شباب يدعون انهم من التنظيم , ولكن بالحقيقه مالهم اي صله فيه مجرد شباب متحمس انخدع بأسامه بن لادن وقال انا من تنظيم القاعده , ولو تمسكه الشرطه يقعد يبجي ويقول اقسم بالله كنت اتشيحط بس
في منهم اللي يقوم ببعض الامور , اما يكونون من التنظيم ولكن رجعوا , او متحمسين و اخذوها لعب وبعدين صارت جد , لكن مايستمرون صدقني و من خلال شهر يتم القبض عليهم
لكن التنظيم الاصلي , اهو نفس الماسونيه
سريه تامه ولا تعرف لهم طريق , ماتدري هم صج بأفغانستان او بأمريكا عايشين احلى وافضل من عيشتنا
شاركه في مابينهم , شركه بن لادن وشركه جورج بوش
وصدقني راح يجي اليوم اللي تتحسف عن كل كلمه قلتها دفاعا عن هذا التنظيم , اللي ماخدم غير امريكا ومصالح امريكا
ولم يقدم للأسلام والمسلمين شي
عطني 3 امور قدمها التنظيم للمسلمين
وعطني 3 امور استفادت منها الاداره الامريكيه
انا بنظري انك تهدي شخص الى الاسلام افضل من انك تحمل السلاح وتقاتل بسبيل شي مجهول
شوف العالم من حولك , انت دافعت عن التنظيم اكثر من دفاعك عن البحرين ضد ايران , قاعده تحرض اذنابها الى ان قاموا بثوره في بلدك
ما هاجمتهم كثر مهاجمتك للي يتكلمون عن التنظيم
شوف العالم من حولك بنظره ايجابيه , شوف المسلمين الاجانب لا تشوف العرب , شلون يناظرون ويحاورون في امريكا واوربا , يحاورونهم بالتي هي احسن بلا سلاح او اموال تدفع
والناس تدخل بالاسلام وكل يوم نسمع عن مهتدين جدد
ولما تشوف تنظيم القاعده تشوف قتل و حاله كسيفه بالبلدان التي يقيمون فيها , اقرب مثال افغانستان ماتشوف الا بيوت من طين و ناس ماتدري اهي تنام بعشاء او على لحم بطنها
وياليت قتالهم له معنى حتى , ياليتهم يقاتلون امريكا فعلياً
لو اتباعهم في امريكا يقاتلون هناك ويدمرون مراكزهم و مصانعهم الحربيه
فقط مستانسين قنص جندي امريكي , مسوي فيلم طول بعرض عشان قنص جندي امريكي , او تدمير دبابه امريكيه , بالقابل تدمع عينك لما تسمع هدم 5 منازل باللي ساكنينهم بسبب قذيفه او صاروخ امريكي
يلا , راح يجي اليوم اللي تستوعب فيه كل هذا
تقبلوا تحياتي و تحيات وقبلات رفيجي اللي عروقه بالماي دام ظله