في السوق يوجد عدد كبير من المكملات .. وأول شيء للاسف يسويه اللاعب المبتدأ هو شراء اكبر كميه من هذي المكملات قبل لايعرف طريقة التغذيه والتمارين الصحيحه
..
معلومه قبل ماابدأ .. أفضل المكملات لاتضيف الا نسبه بسيطه من الاداء بشكل عام .. وتستطيع الوصول لهدفك بدون أستخدام أي مكمل .. ولكن الانسان بطبعه يحب تجربة الجديد واستغلال أي فرصه لو كانت بسيطه للنجاح ..
مكملات جيده :
1- الواي بروتين :
الواي بروتين شخصيا لااعتبره مكمل ولكن اعتبره طعام .. واعامله معاملة الاكل الطبيعي .. وهذا المفروض الواحد فينا انه يسويه .. يعني لايوجد عدد سكوبات معين في اليوم لاستخدامه .. ولايوجد وقت مفضل .. شخصيا احيانا استخدم سكوب واحد في اليوم .. وفي بعض الاحيان استخدم 5 سكوبات .. حسب تغذيتي في ذلك اليوم وجدولي الغذائي اللي وضعته ..
بروتين ال Hydrolyzed مثل الايزو اعتبره مضيعه للفلوس الا لشخص يعاني التحسس من اللاكتوز .. واكثر شيء استغربه لما الواحد يستخدمه فترة التخسيس او التنشيف
.. لان الواحد يقدر يخسس وهو يستخدم مكمل قينر وأيضا يقدر يزيد وزن وهو يستخدم بروتين مثل الايزو .. الفكره كم كالوري تناولت في اليوم بغض النظر عن البروتين المستخدم .. فأتنمى أن لاأشاهد احد يستخدم هذا النوع من البروتين للتخسيس ويسميه (بروتين التخسيس)
..
ال 2-3 غرام من الكارب و 1-2 غرام من الفات الموجود في البروتين العادي ماراح تقتلك وتأثر على جدولك الغذائي اليومي ...
نفس الكلام ينطبق على البروتين قينر .. لايوجد شي اسمه افضل بروتين قينر من ناحية الوزن (من ناحية الصحه يفضل الابتعاد عن القينر اللي يكون فيه نسبة سكر كثير مقارنه بالكارب اللي يحتويه بشكل عام ) .. مره اخرى تستطيع زيادة الوزن بدون استخدام قينر .. يعني تقدر تستخدم بروتين عادي وتحط معاه شوفان وموز وفول سوداني وحليب وانتهينا
اشتر الواي بروتين اللي يكون سعره مناسب وطعمه مقبول لك أو يكون عليه عرض .. اذكر مره دخلت GNC ولقيت مسوي عرض على بروتين GNC وشريت من عندهم كمية كبيره كفتني فتره طويله .. اقول هالكلام علشان ابين لك لايوجد بروتين مفضل او احسن من الثاني ..
2- الكرياتين :
الكرياتين هو المكمل الوحيد اللي عليه دراسات تثبت فائدته للاعب كمال الاجسام .. واستغرب من الشخص اللي مايستخدمه ..
استخدم كرياتين مونوهيدرات من أي شركه بكمية 5 غرام في اليوم في أي وقت في ايام التمرين والراحه طول السنه
..
3- البيتا الانين :
له تأثير قوي على رياضات التحمل والجري .. وراح يبان تأثيره على لاعب كمال الاجسام عندما يلعب عدات كثيره نوعا ما (تأثيره يكون في العدات الاخيره) .. الكميه بين 3-4 غرام من نوع carnosyn من أي شركه في اليوم في أي وقت في ايام التمرين والراحه طول السنه
4- citruatle malte :
مشابه لفائدة البيتا الانين ولكن الدراسات عليه اقل بخصوص تأثيره .. الكميه 6 غرام ..
5- كافيين :
الكافيين افضل مصدر للطاقه للاعب كمال الاجسام بعد الكارب .. استخدم حبوب الكافيين رخيصه ومفعولها جميل .. ابدأ بنسبة 200 مل غرام وزيد لو حبيت .. تقدر تقطعها فتره وترجع تستخدمها اذا بدأت تحس انك تعودت عليها ومفعولها بدأ يضعف ..
الكافيين هو المكمل الوحيد اللي له وقت محدد لتناوله (واللي وهو قبل التمرين بنص ساعه الى 45 دقيقه) .. لان بقية المكملات لايوجد لها وقت مفضل ..
6- مكملات الصحه العامه :
وهي المكلات اللي يكون تأثيرها على الصحه جيد .. وتأثيرها على لعبة بناء الاجسام بشكل غير مباشر .. مثل الملتي فايتمن وزيت السمك وفيتامين د .. شخصيا استخدم ملتي فايتمن Life Force Multiple .. وزيت السمك Ultimate Omega .. وفايتمن د Vitamin D-3 من شركة NOW ..
مكملات سيئه :
هي مكملات سيئه ليس لان لها تاثير سلبي على صحة الواحد (تقريباً) ولكن لان تأثيرها الايجابي ضعيف حتى يكون لها سبب لاستخدامها ...
راح يندرج تحت هذي القائمه أي مكمل لايضع نسب استخدامه للمواد الموجوده فيه .. ويضع المواد تحت كلمة property blend (خلطه خاصه) .. لان الواحد اذا راح يشتري مكمل يعرف وش يبي مهوب داخل محل عطاره ويشتري خلطات
..
1- مكمل الطاقه :
احد الاسباب لوضع هذا النوع من المكلات هو السبب الموجود في الاعلى .. يوجد مكملات طاقه لاتستخدم هذي الكلمه وتوضح النسب ..
السبب الاخر .. شخصيا المكمل الوحيد اللي احتاجه ليعطيني طاقه فوريه هو الكافيين لانه فعال ومريح للاستخدام .. بقية المواد اللي تعطي طاقه مثل فايتمن B12 بنسب عاليه والمستخلصات من بعض النباتات اللي تعطي طاقه لايوجد عليها دراسات كافيه .. تطمن الشخص اللي راح يستخدمها .. علشان كذا حبوب كافيين رائعه وكافيه ورخيييييصه
..
2- محفزات التسترون ومحفزات الهرمون :
استغرب من شخص يستخدم مواد ممكن تجدها للعطاره علشان يزيد عندك الهرمون بنسبه عاليه من أجل زيادة العضل .. نعم المواد اللي تستخدمها في المحفزات تجدها عند محلات العطاره .. مثل الزنجبيل والكركم والحلبه ... الخ (كل هذي مواد مستخدمه في المحفزات) ..
اما بخصوص المواد الاخرى مثل ال GAMA وال Tribulus وال d-aspartic acid فالدراسات اللي عليها توضح ان زيادة التست اللي راح تضيفه ماراح يكون له تأثير على زيادة العضل .. ولكن تستخدم لزيادة الشهوه ..
منتجات ال ZMA واللي هي زنك وماغنيسيوم وفايتمن B6 تاثيرها بسيط ولايذكر .. واصلا غذائك والملتي فايتمن يحتوى على نسبه كافيه منهم .. (معلومه يجهلها البعض .. الانيمل ستاك يحتوي على ZMA
) ..
معلومه اضافيه .. بعض الاشخاص يستخدم محفز ويجزم بأنه يعطيه طاقه خلال التمرين .. والسبب يكون اضافة بعض الشركات للكافين لمحفزاتهم مثل الانميال ام ستاك ..
3- مكملات حرق الدهون :
لنفس الاسباب اللي فوق .. مكملات لاتحتوى على نسب واضحه من المواد اللي يتم استخدامها .. وايضا استخدام مواد لايوجد عليها دراسات او الدراسات اللي تم استخدامها توضح ضعف هذي النتائج ..
* اسثني من ذلك اليوهمبين HCL الدراسات اللي عليه جيده وتظهر نتائجه بشكل افضل عند نسبة الدهون المنخضفه ولتخفيف الدهون المستعصيه .. ولكن له طريقه معينه لكمية الاستخدام ووقت الاستخدام .. ان شاء الله بعد التجربه راح احط تجربتي معاه
..
مكملات مضيعه للوقت :
وهي المكملات اللي استخدامها غير سيئ ولكن لايوجد لها داعي .. وجسمك يصل له الكثير منها عن طريق الغذاء الطبيعي ..
1- الامينو :
من اكثر المكملات استخداماً ومن اكثر المكملات مضيعه للوقت سواء كان رقمه 2222 او 1000 او حتى عشره مليون
.. البروتين بشكل عام سواء من البيض والدجاج او من الواي بروتين يتكون من الاحماض .. فلماذا تستخدمها بشكل منفصل .. الاحماض اللي فيها كافيه ووافيه ولايحتاج استخدام شي منفصل .. أيضا لايوجد سرعة بالامتصاص او تأثير افضل اذا تم استخدام الاحماض بشكل منفصل ..
2- ال BCAA :
الواحد اذا جا يبي يتفلسف ويكشخ على اللي يستخدم الامينو .. قال انا أستخدم BCAA
..
ال BCAA يتكون من 3 احماض رئيسيه وهي Leucine وال Valine وال Isoleucine .. وجميع هذي الاحماض موجوده بوفره في البروتين بشكل عام وخاصه في الواي بروتين .. يعني سكوب واحد من اشهر منتجات ال BCAA مثل الاكستند فيه تقريبا نفس الكميه الموجوده في سكوب واحد من الواي بروتين .. ونفس الكلام راح ينطبق هنا مثل ماهو موجود في الامينو بخصوص سرعة الامتصاص ..
أيضا 100 غرام من الدجاج فيه كمية BCAA تعادل نص سكوب من الاكستند .. وقس على ذلك الكثير ..
3- الجلوتامين :
الجلوتامين حمض مهم جداً ولكن لايوجد له داعي لاستخدامه بشكل منفصل ... يعني استغرب ذلك بشده بسبب انه اكثر الاحماض الامينيه الموجوده في الطعام والواي بروتين .. يعني مثلا سكوب واحد من الواي بروتين يعادل 2 سكوب في الاكستند من كمية الاكستند ..
نفس الكلام ينطبق بخصوص سرعة الامتصاص .. ونسبة الجلوتامين لبقية الطعام ..
----------------------------------------------------------------------------------------------
----------------------------------------------------------------------------------------------
أنتهى
يوجد شيء مهم في عالم المكملات .. بعض الاحيان الواحد يستخدم مكمل معين (غير فعال) لكن تشوف نتائج جيده عليه .. السبب في الغالب هو ال placebo effect او التأثير الوهمي .. وهذا شي متعارف عليه حتى في المجال الطبي .. تشوف بعض المرضى يعطوهم حبوب وهميه ولكن يتعالجون من مرض معين .. السبب الاخر انه الواحد دائما اذا اشترى منتجات معينه (خاصه جديده وسمع أن فوائدها كبيره) .. تشوفه متحمس ويحافظ على اكله وشدة تمرينه بشكل اكبر علشان كذا تظهر عليه نتائج ايجابيه بشكل عام ..
كلمات وجمل عندما اسمعها او اقرأها تنرفز الواحد بشكل كبير
:
- ماهو افضل بروتين دايت ..
- ماشفت تأثير الا لما غيرت البروتين اللي استخدمه .
- ال BCAA يحافظ على العضل ..
- ال BCAA يمس العضل ويروح له بشكل مباشر .
- الجلوتاميين وقت التنشيف والتخسيس يحافظ على العضل ..
- الكرياتين خطير .
- يجب شرب الماء بكميه كبيره عند استخدام الكرياتين .
- الكرياتين المخلوط افضل .
- الواحد يتعود على الكرياتين والمفروض يغيره كل فتره .
- الكرياتين يعطي باور بشكل مباشر .
- استخدم الكرياتين قبل التمرين او بعده بشكل مباشر لنتائج افضل .
- الامينو 10000000000000 امينو بطل .
- استخدام المحفزات ومنتجات الطاقه والحوارق راح يأثر على صحتك ويوجد لها عمر محدد .. يقول هالكلام علشان يضع لهذي المكملات هيبه وفخامه.
اذا باقي شيء راح اضيفه بعدين
بالتوفيق ..
المشاركة الأصلية كتبت بواسطة aalfarhood
اخوي المبتدئ يجي يقرا كلامك يجيه الهم ويقول السيريس ماس مظيعة فلوس وياخذ منك الكلام مندون مايعرف الاسباب ويبدا ينقله للناس والناس تتناقله وماتعرف ليه.
